粤讲粤明
□曾锦燊
日前，有朋自远方来不亦乐乎！但係我朋友就乐唔起来——原来佢啱啱出客运站门口，有人大叫“一蚊一件哈密瓜”，朋友嘅四岁细路话要食。畀钱嘅时候，卖瓜人却收5蚊—
—原来嗰嚿瓜度有四处浅浅嘅刀口，佢就话係五件，要收五蚊。面对卖瓜人好恶嗰样，人生地不熟嘅朋友唯有乖乖就范。
呢件事激嬲咗我。呢个客运站就喺我屋企附近，我暗暗发誓，有机会一定要玩玩嗰个衰仔！
某日，机会来喇——我嘅朋友，外号“大只强”来访。佢生得牛高马大，好有煞气。佢返屋企等车嘅公交车站就喺嗰个客运站门口。话别嗰阵，我要送佢上车，大只强话：“今日点解咁客气呀？”我话：“有条件呀！”随后我将计划讲畀佢听，“君子动口不动手，你只要扮下嘢就得喇！”“噉就‘易过借火’喇！”
冇几耐，我哋去到客运站，就睇到我朋友讲嗰个中年卖瓜人仲响度呃神骗鬼。我叫大只强暂且留步，免打草惊蛇，我先行过去。
“一蚊一件，快来买啊！”嗰个家伙一见有人行埋，就大声噉啀。我攞起两件，话：“咁大件，真係抵食！”将两蚊鸡递过去。“咩话？呢嚿係10件来噶，你数下！”佢话。我冷笑一声，攞出铰剪仔，将嗰两张一蚊纸轻轻剪咗八下，然后一“页”一“页”噉数：“唔该你睇清楚！呢度係10蚊来噶！”
“有冇搞错吖！”佢啱啱想发恶，忽见身边唔知几时企咗个双手叉腰、黑脸黑口嘅彪形大汉，即刻软晒：“我唔卖喇！”大只强话：“人係你，鬼又係你！你话点就点？！”卖瓜人呢次终于见到“恶人”喇，喇喇声将啲瓜装好交畀大只强。係围观者嘅支持、喝声中，我哋两个大摇大摆而去。然后揾个垃圾筒掟低(怕有害健康)。
之后谂起来，我咁样做虽然出咗口气，但毁损人民币亦唔应该。大家千祈唔好学呀！若果撞到同类事情，仲係报警为妙呀！
