论尽母语
□PippoYUEN
自从我写嗰篇关于懒音嘅文章出咗街之后，有啲朋友就同我讲：“咦，乜真係噉嘅咩？睇嚟我哋真係要正视懒音呢个问题，讲好粤语咯。”亦都有朋友建议将呢种懒音嘅情况
归纳分类，同时举多一啲例子以便大家可以更好噉了解认识。依家先从韵母方面讲吓懒音嘅情况。
1.“係咯，天河嗰边成日‘失’车咖。”有一日，办公室嘅靓女PaulyCheung同我抱怨广州依家嘅交通状况。究竟係“失”车定係“塞车”啊？我当时真係想问。呢个就係常见嘅将带k嘅塞音入声韵读成t塞音入声韵嘅懒音现象喇。噉讲可能好抽象，再请大家睇睇以下几个例子啦：好多NBA巨星都係“黑”人，佢哋收入唔错，唔使做“乞”人；乌龟身上嗰个係龟“壳”，由于其长期生活喺水度，所以佢哋唔会龟“渴”；我讲呢啲係“百分百”真话嚟咖，唔係“八分八”……呢啲例子大家应该听得好清楚喇。依家先从韵母方面讲吓懒音嘅情况。
2.如果有人同你讲：“我对你嘅爱係永‘痕’嘅。”噉请您尽快离开佢，若果唔係嘅话您就要“永恒”噉挠痕喇。呢种情况就係将后鼻音ng变成係前鼻音n。如之前《懒音唔懒理》所提到嘅香港读成香“赶”、朋友读成“贫”友，又或者将生动读成“身”动、行情读成“寒”情等等都係属于呢一种情况。
3.将鼻韵简化。有个噉嘅笑话，话有对夫妇、佢哋个仔名叫笨。有日阿仔突然失踪，两公婆到差馆报案。值班警员问个老公：“你叫咩名啊？”答：“李广仙。”警员又问佢妻子：“你叫咩名啊？”答：“吴港住。”个警员好嬲，再问：“噉你哋嚟做咩啊？”两公婆一齐答：“搵李笨！”其实粤语韵母有两个鼻韵ng同m，以上例子就係利用“唔［m4］”同“吴［ng4］”两者发音相近嚟产生笑话喇，“吴港住”为“唔讲住”之谐音。如果唔注意，会好容易将两种发音混淆。
以上就係一啲有关粤语韵母懒音方面嘅例子，其实只要我哋细心留意，用心讲读，就会好容易讲好讲清粤语咖喇。希望再有机会同大家一齐探讨下有关粤语声母懒音方面嘅问题。
