同声同气
□阿展专栏
(人物：茶客甲、茶客乙地点：广州某茶楼茶皇厅时间：本月某日)
甲：揾我出嚟饮茶，有乜好带絜先？
乙：呢排水紧，想揾你睇下有乜带絜就真。呢排搞乜嘢多呀？
甲：冇啊，呢排都係玩下波同六仔咁啰。
乙：我都有玩啵，今晚有乜心水先？
甲：今晚我睇红双同埋马骝。
乙：唔係啵，白小姐话挂起红波啵。
甲：信我啦，坚料嚟嘎。
乙：噉就瞓身喇。
甲：噉买几多呀？
乙：红，双，马骝50文过关啦。
甲：又话冇钱？
乙：笃住手指先咋，开咗出嚟，听日咪有啰。
甲：实开嘎？如果开唔出呢？
乙：开唔出先算啦。或者有运行呢。
甲：咁又係。有时行起运嚟，钱都有得你执。今日报纸买：寻日中午喺河南朗X居，有个人飮大咗，喺16楼洒咗两千几文一百文纸落嚟，冇人敢执添。
乙：嗱嗱嗱，你话我几黑仔啊，我就喺个头住之嘛，咁都撞唔倒。係味冇运行啊？呢牌净係波同埋六仔，就搞到我身光物净！
甲：噉你点呀？
乙：有乜点呀，值啲钱嘅嘢都卖哂啦。就嚟卖埋个肾嘎啦。
甲：你估个肾咁易卖呀？我听朋友讲，卖个灵魂容易啲。
乙：灵魂？乜嘢嚟嘎？我有冇嘎？
甲：人人都有嘎啦。横掂你都冇乜用嘅。
乙：卖得几钱嘎？
甲：唔同嘅，听讲美国佬嘅灵魂卖过八嚿水美金。中国人平啲，四嚿几人仔啦。
乙：不过，卖咗会唔会伤身嘎？
甲：唔会啩。最多係失魂啲啫。
乙：都好啵。咁点卖呀？
甲：听讲要喺网上卖嘎。都几抢手嘎。我个朋友有做网上生意嘅。等我问下先啦。
乙：嗱临啦，我赶住落注嘎。
甲：咁埋单啦。
乙：你埋住先啦。
甲：你冇钱又叫我出嚟饮茶？
乙：最多听日我埋啦。
甲：听日？
乙：你又话啲料咁坚，今晚开咗咪有啰。
甲：……唔该，埋单。
