粤讲粤明
□话梅核
阿扬嚟珠海嘅第二日，喺体育中心附近同啲同事聚餐之后，天都好夜喇，就谂住打的返拱北。同事特意话佢知，行隧道，差唔多25文到。
阿扬叫咗部的士，“到拱北某花园。”讲完，重加多一句，“行隧道嗰条路。”司机佬听出佢唔係本地人，就特登问佢：“行边个方向啊？”阿扬懵咗一下，谂啱先自己坐13路车过嚟体育中心呢边係行梅华路，就指向梅华路嘅方向话：“行嗰边。”
起步价10文，阿扬好紧张噉死望住个表，当跳到25文嗰阵时，阿扬根本就唔知自己喺边，但架车重一直噉行。个表跳一次，阿扬嘅心跳就跟住加快一啲。车行过市政府嗰阵，已经跳到50几蚊，阿扬谂到自己朝早过嚟嗰时，冇经过呢条路，噉就係司机佬喺度兜喇。好，我就睇你可以兜几耐……车係噉一路行，兜咗差唔多成个珠海先到拱北某花园，个表已经跳到90几蚊喇！阿扬好大方噉攞出一嚿水，“唔使找喇，就当係你兜得噉辛苦嘅小费。”跟住就同司机要咗的士票，好淡定噉将张票摆喺司机面前，“唔该司机大佬，帮我喺张票上边写住喺体育中心到拱北某花园，冇塞车，再签下你嘅名喇。”
司机估唔到会遇到噉嘅客，啲语气都有小小紧张：“你要做咩？”“冇乜嘢，我攞返公司报销啊嘛。”阿扬睇到司机紧张嗰样，喺心入边偷偷噉笑。司机梗係唔敢照写喇，就喺度求阿扬，“靓仔，我睇我地就折中喇，收你50蚊，点啊？”阿扬唔肯退步：“唔得，人哋同跟我讲廿几文到嘅地方，你居然兜到一嚿水噉多，而且一开始我就话你知行隧道喇，你重虾我唔识，等我指错个方向。如果你兜个三几十文都算了，你重咁黑，唔投诉都唔得。”
畀阿扬噉一吓，司机惊到乜，即时话一分钱都唔收，求阿扬就噉算喇。一开始，阿扬死都不畀，后尾谂下，自己都免费睇咗成个珠海的夜景，都抵喇，就收返自己嗰一百文，唔同司机计较，不过就叫要司机下次阴住啲，冇再呃人喇。
