粤讲粤明
□卢碧玲
我屋企喺老城区嘅三楼。二楼嗰度有个大平台连接住南、北楼。唔知几时开始，住平台边嗰一户开始扩张，将钢窗改成门口出入，再用铁皮搭建起超大嘅簷篷。之后第啲住户
亦有样学样，冇几耐，成个平台都畀铁皮覆盖晒。呢度冇物管，平台亦唔向马路，“并唔影响市容”，所以投诉无效。
灾难从此降临，三楼各住户开始当灾。四至八楼掟落嚟啲胶袋呀胶樽呀等各种垃圾就喺我睡房窗下。无奈之下我准备咗一条好长的竹，因应垃圾的“厚度”不定期展开“推送”行动；距离太远嘅，就揾机会下气咁求楼下住户“唔该帮手清请”。
某日，忽闻窗外飘嚟阵阵浓郁之味，搜索之后，原来外面窗脚有督猫屎！唉，呢回用“竹功”都无用啦！只有用“水攻”啦！更加激气嘅係，猫中意追味，疴咗一次就晚晚如期而至。因难以掌握其准确位置，试过喷杀虫剂、撒石灰、老鼠药都冇效。最尾想到用电线电，但经过朋友“铁皮会导电，若果电死下边个屋主你就大镬”嘅忠告后，又放弃埋。最终，起床之后挽一大桶水，一壳一壳噉对住外面嘅“患处”冲，成为每朝必修功课……
一年前，借住拆网之东风，本人借机展开天女散花式嘅投诉，呢啲簷篷终于连同防盗网一齐拆晒，嗰日高兴到一味想烧炮仗！
边知，我高兴得太早啦！簷篷虽拆，平台住户嘅“窗改门”还在，佢哋依旧重喺平台度开洗衣机、晾晒等——以前声音不过畀违建物所隔啫，如今送走咗视觉同嗅觉污染，又迎来佐听觉污染。下边左边嗰户男主人係的士佬，佢落班冲凉后约12点半开动洗衣机顺便淋花之时，正係我刚入梦之际。而正对下边嘅嗰户女主人仲离谱，经常凌晨三四点先晾衫，仲出死力噉扬，“篷！篷！”之声搞到我梦中成个弹起。
最近接到通知，因建地铁本楼拆迁。阿弥陀佛！这苦日子总算係真正熬到尽头啦！
