白话寓言
□Pippo
循例又係好耐好耐以前，动物王国入面嗰个揸fit人阿狮子哥就话想发展区内经济、搞好民生，打算拣个地方搞条地下隧道。佢就将呢件事交咗俾佢嘅秘书狐狸去跟进。
其实阿狮子哥一早就想将条隧道起喺猫科动物区，咁样就可以益晒佢啲狮虎豹猫兄弟啦。狐狸秘书一开始都好客观噉搵晒啲专家，如测量部门嘅蛇仔明、运输业界代表晒骆驼、挖掘工程部主管鼹子等等一齐讨论拣地方嘅事。点知呢班专家真係好鬼专业，个个都係灶君上天——有嗰句讲嗰句，通过大量嘅数据、图表等分析痛批喺猫科动物区起隧道唔实际：地区偏僻、地底结构复杂等等。狐狸秘书心谂：如果将呢份report交上去畀揸fit人睇，感唔係寿星公吊颈——嫌命长！
跟住，狐狸秘书改变咗方法，佢邀请猫科动物区、灵长动物区、偶蹄类动物区、海洋生物区、空中生物区等区嘅代表过嚟开会。一开始，狐狸秘书就同大家讲，阿狮子哥话，为咗……(以下省略约3000字)，我哋准备兴建一条地下隧道。噉呢，阿狮子哥就觉得呢喺猫科动物区兴建可能会比较好，今日召集大家嚟呢，就係想同大家研究一下，攞一个统一嘅意见出嚟。
听完之后好多代表都鸡食放光虫——心知肚明啦，灵长、海洋等大多数区都表示赞同，重讲咗一大堆喺猫科动物区兴建嘅好处添。但係偶蹄类动物区代表牛精就“死牛一片颈”，点都唔肯同意；而空中生物区代表鹰雄亦都提出反对嘅意见。经过几次激烈嘅讨论之后，两位都坚持自己嘅意见。
噉点办呢？狐狸秘书就谂办法将偶蹄类动物区代表牛精换成阿马拍，跟住再派鹰雄外出考察温带落叶阔叶林带地面是否适合雏鹰成长与活动。大家应该都可以估到，阿马拍实会好赞成喺猫科动物区兴建地下隧道啦，咁样，狐狸秘书份报告就可以噉写喇：“为发展经济，改善民生……决定兴建一条地下隧道。
选址研讨会上，与会代表纷纷表示隧道要建于一个合适之处，咁样先至可以更好感发挥作用，造福社会。最后，参与会议嘅代表一致通过喺猫科动物区兴建该地下隧道。工程定于年底进行……”
搞掂，捞面！
