港人讲嘢
□Inzaggio
1.爱情
白雪公主，几咁纯洁无瑕。但係谂真啲，白雪公主，识得嗰个係王子，灰姑娘识嗰个又係王子；有个有特殊嗜好，中意锡青蛙嘅女人锡咗只青蛙一啖，只青蛙变出嚟嘅又係王子！有冇人谂过根本个王子係同一个人呢？根本呢个王子都不知几花心，周围媾女，仲无良到扮青蛙去媾添！
(细个嗰阵由于受童话影响，成日发梦想做一只田鸡，可以识倒幼稚园隔离班嗰个嘉欣，同佢一齐玩煮饭仔；大个终于愿望成真喇，不过个愿望出现咗小小偏差，係变咗一个冇咩女仔想识嘅“四眼”田鸡。)
2.“鬼叫蛤乸净係夹乸唔夹公咩？”
(一只青蛙跳落水，两只眼时四条腿，呱，呱：“做咩成日搵我嚟讲啊？！”)
3.泳池
黄子华(下简称“黄”)：去公众泳池嗰啲唔係叫做游水，嗰啲叫做浸水。因为喺公众泳池游，只可以用一种泳式，就係弹式，同一个位，弹下弹下。
张达明(下简称“张”)：如果係高手可以用自由式，但係要潜落水底嗰度用。
黄：点解香港啲泳池咁鬼迫嘅呢？
张：唔好问啊，趁人多你好快啲浸下。等阵所有人上晒水嗰阵，你就会发觉，个池啲水原来到膝头哥咖咋！你去浸脚趾啦，下次。
黄：其实我哋香港人都习惯咗人多，去浸下水都好。但係可惜嘅係，呢啲水，唔係一般水，呢啲係暖水！你成日喺泳池度会发觉有啲人，全身唔喐，眼碌碌。
张：哦，你喺泳池屙尿，咁冇公德心！由细到大我老窦都教我咖啦，急尿，去隔离池啊嘛！
黄：所以我喺度趁呢个机会，同你啲僆仔讲啊！游游吓小童池就走过嚟大人池，擒喺个池边，唔好话我听係学游水啊！
张：特别係擒正喺喷水口嗰啲啊！想毁尸灭迹啊！
(所以无论係港人定係我哋广人都要有良好嘅公德心啊，要不断提高自身修养；公民素质教育，任重而道远啊……)
