白话寓言
□Pippo
上次发表咗《动物王国嘅地下隧道》之后，有小朋友问：“究竟狐狸秘书谂咗啲咩办法将偶蹄类动物区代表牛精换成阿马拍呢？”
件事係噉嘅：喺地下隧道选址嘅研究搁置期间，撞啱偶蹄类动物区区代表进行换届选举，牛精同阿马拍属于大热嘅人选。选举到咗关键嘅阶段——民调，按照惯例应该係收集区内合资格人士对候选人嘅意见，由秘书整理后写成报告交由揸fit人任命嘅。牛精份人虽然做事会死牛一片颈，但係佢真係好热心区内事务，因此佢得到唔少人嘅支持；同时由于佢嘅执着亦都会得罪咗某啲人。而阿马拍，都有名畀你叫安啦，嘢就冇做咩喇，不过胜在识做“冇耳藤篋——靠托”，又唔会得罪人，所以啲人既唔会太支持佢，亦都冇咩反对嘅声音。
咁样，狐狸秘书就要喺份调查问卷度谂办法喇，如果就噉问人哋对两位嘅睇法，优缺点啊，咁实听床下底破柴——撞晒大板啦。因为牛精为大家做咗咁多嘢，瑕不掩瑜，实会评价好高啦；而阿马拍由于对区内冇咩太大建树，应该就唔会得到较高评价。狐狸秘书就改变咗调查问卷嘅方式，唔用呢种受价值观与个人偏好影响较大嘅定性调查方式，而改成将相关问题提出后，再要求合资格人士按“非常满意”、“满意”……“不满”、“非常不满”等分数级别进行选择回答。咁样就唔同咯，虽然好多人都畀咗牛精较高嘅分数，但係由于之前讲嘅有啲人好唔妥佢，专登畀咗佢好低分，因此拉低咗总体分数。阿马拍得到嘅分数唔係太高，但係胜在够平均，所以两者喺总体分数上就显得不相上下。
最后，狐狸秘书份报告就可以噉写嘞：“两位候选人虽然得分接近，但由于牛精得分差别较大，恐其不能全面代表区内声音，不能较好兼顾多方利益，协调同其他区嘅工作与交流；而阿马拍能得到区内人士嘅普遍支持，得分颇高，较为平均，其较好嘅交际协调能力应该能为偶蹄类动物区表达意愿，反映心声，建议……”
咁样狐狸秘书就通过呢种办法将偶蹄类动物区代表牛精换成阿马拍嘞。又搞掂，捞面！
