广州往事
□陈明
喺“老三多轩”名人书画、文房四宝浓厚书卷氛围里面，几个人跟住老先生用粤语读《诗经》：“关关雎鸠，在河之洲……”粤语版《关睢》读起来嘅韵味都唔同咖。当读到
《关雎》中嘅“求之不得，寤寐思服”当中嘅“服”字，老先生话，如果读“服”就唔押韵啦，就要用粤语“匹”嘅音来读先至押韵。其实嗰D“学生”都唔细咖，年龄有廿几至六十几，有大学老师、私企老板、研究员、退休老工人……有个大学老师讲，依家学校教学多数用普通话，但古诗嘅古音同今日嘅读音唔同，好多经典古籍中嘅字需要用粤语发音，所以请老先生讲课同领读好重要，喺呢度学到比学校更多嘅知识。老先生话，粤语汇集咗各地元素，喺广东话中有9个音，普通话净得5个。诗经中好多句子用普通话读就唔通，用粤语读就押韵啦。
老先生仲讲啲趣事畀大家听，佢细个时先7岁就读私塾，俗话叫“卜卜斋”，开学时间喺农历十月至十二月，又叫“开冬学”，返学前家长要自己搬台凳去卜卜斋，仲要摆“开学酒”，亲友送啲纸、笔畀细路。开学嗰日，学童要着新衫，拜神祭祖，用红布将《三字经》、《千字文》、《幼学诗》三本启蒙书裹喺肚前，家长喺细路个袋入边放棵葱，寓意“聪”明好学。有钱人家嘅学童由老窦陪住去卜卜斋，前面仲有人攞住写咗“文星高照”嘅红灯笼引路，后面有人担住装咗拜孔子嘅祭品同送畀先生礼物嘅竹箩，仲有分畀同学仔嘅甘蔗、水果同糕饼。入学仪式好得意，老窦带仔去安排好嘅座位，将一块用糯米粉做好嘅“薄撑”放喺凳面，叫仔坐落去，“薄撑”粘住仔嘅屎忽先好，有勤奋读书嘅意头。上课时，先生问：“你嚟做乜嘢？”学童答：“读书。”先生问：“书喺边度？”学童指住裹喺肚前嘅书答：“书喺肚里面。”学童叩拜孔子神位后，家长畀先生送上笔同礼品，请先生为仔启蒙，亦叫“开学”。然后，先生领学童读《三字经》：“幼而学，壮而行……”最后，先生抓住学童嘅手教佢用毛笔写：“上大人，孔乙己……”呢个就是“开笔”啦。
听完老先生讲，先知道旧时读书竟然有咁多规矩咖。
