粤讲粤明
□卢碧玲
嗰晚畀电话阿冰想约佢第二日饮茶，但佢话：“以前我老细古生约咗听日食饭，不如一齐喇！”我颇感意外：“佢有咁大方？”“古生要同人倾一单餐具方面的生意，佢知我
以前喺酒店管家部工作过，对此比较在行，所以请我帮下手啫。你都在行，同佢又有一面之缘，你嚟食饭咪即係多个帮手啰，唔使谂咁多，就咁定喇！”
哦，原来唔係白食嘅！放下电话，我不由谂起依个好耐冇见嘅古生。佢嘅节俭轶事我略有所闻，不过无缘领教。记得有人曾经一针见血畀佢一句点评：“每月100蚊(零用钱)就够晒使。”但係呢次请食饭係为咗“事业”，可能会大方啲。
第日上昼11点多啲，我如约喺某茶叶市场门口见到咗阿冰同古生，佢都几欢迎咁。一番寒暄之后，阿冰提议，反正食饭嘅酒家离此好近，时间尚早，不如入茶市场行下。
二十分钟后，我同阿冰正喺度拣茶具，古生嘅手机忽然响起，佢接听后，神情有啲唔自然，原来同倾生意嘅对方临时有急事唔嚟得，改为明天。阿冰话，冇计喇，至多听日跑多次咯！
出到茶叶城门口，睇下表：12点多，个肚亦都咕咕响。我同阿冰正要向右边饭店方向行去，忽然畀古生叫住：“真係唔好意思，你哋自便。我有啲事要走先，我今晚再畀电话你哋喇！”
唔係卦？咁都得？我望望阿冰，依次轮到佢都唔自然啦。见场面有点尴尬，我便皮笑肉不笑咁话：“古生唔肚饿咩，係就走先喇！反正依家冇乜正事，纯粹医肚啫！”
望着佢嘅背影，阿冰长叹一声：“真係唔孤寒做唔到老细啊！唔通冇事就唔使食饭咩？”我故意皱住眉头话：“我重惨到贴地啦，想做番次三陪都无人肯济！”
