疯狂粤语
□薛锵
1.有个着住一身姣婆蓝嘅肥师奶迫巴士迫到死死下，啱啱攞住扶手企定，就见到个孭住书包嘅细路女企起身，好似想让位畀佢坐咁。肥师奶即刻揿低个细路女，话佢好乖，有
礼貌，又话大人企下冇乜所谓，细路女企唔稳跌亲就唔好嘞。到咗下一个站，个细路女正想话企起身又畀佢揿低，个肥师奶话自己咁大份，身壮力健，唔使人哋照顾嘅。又到站嘞，个细路女俾佢揿低之后大声嗌，肥师奶话你嗌乜啫？佢惊到眼定定咁望住个肥师奶话：“阿姨，我嘅屋企都过咗几个站喇，你点解仲唔肯畀我落车噶？”
2.阿辉仔搭地铁去尖沙咀，佢一路都喺处噍香口胶，有个伯爷婆就一路係咁望实佢，佢觉得好奇怪。落车之后嚟到出口，点知又见到嗰个伯爷婆跟住佢，行埋嚟之后仲好大声咁同佢讲：“书院仔，你啱先喺搭地铁嗰阵时一路口噏噏噉同我讲乜嘢吖？我嘅耳仔聋咗，一啲都听唔到。以后记住搭地铁嗰阵千祈唔好同我讲嘢，知道吗？”
3.阿福係个烟铲嚟嘅，有一日，佢去一间士多度买嘢，问个事头婆攞支啤酒嚟睇，睇咗下就大大声噉话唔买唔买。跟住自己就攞咗樽可乐，睇咗下就对个事头婆讲：“唔该你换一包公仔面畀我。”攞咗公仔面又话换曲奇，攞咗曲奇又话换包烟仔，攞咗包烟仔之后转过身就想走。个事头婆即刻扯住佢要佢畀钱，佢就话：“我又冇买嘢，畀乜钱吖？”事头婆话：“你攞咗包烟仔喎。”阿福就话：“烟仔係我用曲奇饼换嘅。”事头婆话：“咁曲奇饼呢？”阿福又话：“曲奇饼係我用公仔面换嘅。公仔面又系我用樽可乐换嘅。”事头婆话：“咁嗰支啤酒呢？”阿福就话：“我睇咗下就话咗唔买个噃，你唔记得咩？咁冇记性，点学人做生意吖？”
