广州随笔
□李永源
有人话斩手指可以戒赌，我唔係几信。事实上，斩手指不过係一次发誓啫，同践诺係两回事。
嗜赌嘅危害，嗜赌者自己其实何尝唔清楚，但佢哋为咩即使十赌九输依然乐此不疲？经我留心观察发现，原来绝大多数涉赌者皆有一个“通病”：缺乏生活情趣，即极少生活爱好同娱乐活动，此为踏入赌圈嘅先决条件。其次先係“揾快钱”心理作怪，重有赌博好似吸食毒品咁样会上瘾所致。
我重唔止一次喺旅行团团友嗰度得到反证：喜欢旅行等活动嘅人无论男女极少涉赌。
从生活情趣缺失呢个“温床”开始，到精神空虚、百无聊赖，再经耳濡目染，于是有一定刺激性嘅赌博活动就因利乘便咁成为呢啲人嘅首选娱乐甚至惟一节目——一个赌徒的“孵化”过程就此形成。
所以我认为，若想唔赌或戒赌，首要问题係唔畀“无聊”滋生。点样让生活充实啲，有趣起来？方法就係，喺空闲时间尝试、培养某啲力所能及又有益身心嘅娱乐或嗜好。迈出呢关键嘅一步，你就同“赌”字有咗距离。
经过一段时间，到你觉得好多嘢值得欣尝，诸多活动你唔想拒绝嘅时候；当你为你阳台上嘅花草嘅盛衰、嗰对鹦鹉嘅食欲而关心，喜看鱼缸里嘅魚婀娜多姿嘅时候；当一段音乐一首好歌让你共鸣，一篇美文让你感动嘅时候；当你郊外踏青手拿相机陶醉于大自然……此际你就唔得闲无聊，唔得闲听人讲赌。你与赌博告别之日已开始到来——因你终于懂得，这世界原来比赌有趣、刺激嘅嘢大把啦！而且重能够养性怡情添。而呢啲花费亦唔似赌博咁样唔受控制，而係丰俭由人噶！
