论尽母语
□PippoYUEN
上几次嘅文章分别从韵母、声母嘅角度探讨归纳过粤语懒音嘅情况同埋举咗一啲例子，显示出其实懒音现象并唔少见，一唔小心，懒音好可能就会从您口中发出。而且呢种不
良现象仲有蔓延嘅趋势，既对粤语嘅纯洁性构成威胁，亦都会影响有心学好呢种语言嘅朋友。噉究竟懒音嘅成因係点呢，点解会发出懒音呢？我有几点睇法想同大家分享下。
1.发音相近造成懒音。l与n，ng同m等发音都比较相近，唔注意就会好容易读错。就好似之前提到嗰个搵李笨嘅笑话当中，“李广仙”同“你讲先”、“吴港住”与“唔讲住”，当笑话嚟听当然比较有趣，但係平时讲嘢最好将呢啲音发清楚。
2.悭力原因。现代人工作忙碌，生活紧张，相互间传递嘅信息量又不断递增，所以有时贪方便，讲吓讲吓就会为咗悭力而讲出懒音。例如将“广”讲成“港”、“点”讲成“典”等都好可能係由于后者比前者发音更悭力嘅缘故。
3.互联网产生嘅网络语言令新一代更容易讲懒音。哦想(我想)、5错(唔错)、果度(嗰度)、发out豆(发吽哣)……有时为咗提高打字速度或者彰显个性，佢哋会使用一啲容易搵嘅字或者其他符号嚟代替原字，久而久之就会按照呢啲唔规范嘅字符嚟发音而导致懒音，或称为非正音。
其实要纠正懒音并唔困难，只要我哋平时留心听，比如係多啲听标准嘅新闻播报员报道新闻，用心讲，多啲睇，噉您就好容易讲得一口标准、清晰、流利嘅粤语喇。懒音真係唔懒理咖！
