广州往事
□陈明
按农历，今年双春兼闰月喺吉年，而明年无咗“立春”呢个节气，就喺“盲年”，所以我今年年底一下就收到咗亲戚朋友派嚟嘅五六个喜帖啦，个个后生都话要赶喺今年底结
婚，睇黎我呢个月要准备多啲钱封大利市啦。
婆婆同我讲起好多婚娶嘅旧事。佢话，旧时婚姻必定要凭媒妁，父母作主。男女都各自以生辰八字开列庚帖，睇下有无冲克，俗语话“合八字”。之后择日下聘，送女家金银首饰同布匹衣料等，俗语话“小定”或“压定”。再定日子，择婚期写成红帖，连同彩礼聘金，送去女家。彩礼有簪饰、衣料、猪肉、时果、糕饼、钱币等。女家回聘一啲衣物时果。各自将果子糕饼等分别赠畀亲友；亲友又送番啲礼金、礼品作贺。迎娶前，女子修面剃额，叫“开额”。男子就剃头沐浴，叫“上头”。新娘在家中由阿妈或者姐妹边帮佢梳妆打扮边唱《梳头歌》：“一梳梳到尾，二梳梳到白发齐眉，三梳梳到儿孙满地……”新娘着上大红衣裙，脚上着红色绣花鞋。身着长衫礼服、披十字红绸、头戴礼帽嘅新郎带花轿一到，就要向女家三催三请，加封利市，先由大矜姐将新娘带出厅堂，向父母叩别，老豆将红绸巾盖喺出嫁女头上，新娘要放声假哭，表示唔舍得父母，再由大矜姐背出门口，另一个大矜姐打着红伞遮住新娘，送佢坐上花轿，到男家由大矜姐背入去男家，由傧相主持，伴郎伴娘扶新人三叩拜，俗话叫“拜堂”。男家办酒席招待亲戚朋友。晚上入洞房，新郎揭开新娘的盖头，饮埋交杯酒先睡觉。婚后三日仲要回门……真喺规矩多多，依家就兴以小车迎接，有啲简单到只在喜期摆几围酒，宴请亲戚好友或只分喜糖，简单多啦；有啲仲集体结婚、旅行结婚添。
