栋笃论语·学而第一
□子野专栏
【原文】子曰:道千乘之国,敬事而言,节用而爱人,使民以时。
【译文】孔子话:治理一个拥有一千架兵车嘅国家,就要严谨且认真噉去办理国家大事,仲要坚守信用,诚实冇欺骗,要注意节约财政开支、爱护啲官吏下属。仲有嘅,就係役使啲百姓令佢哋唔可以误咗农时。
【栋笃】儒家思想,其实唔单止係讲仁义讲道德咖,讲政治,亦都係《论语》入边一个“要同大家分享”嘅“好重要嘅主题”添。孔子周游列国,不嬲都想从政嘅,虽然去到好多国家同啲君主倾过,结果都擦唔出火花,净係得个桔,有时甚至乎搞到好似神台猫屎噉,佢都係矢志不改且乐此不疲添。呢一句,係《论语》中第一次出现嘅治国理论。“道”通“导”,係治理嘅意思。春秋时期,国家嘅大细以兵力为标志,一千架兵车嘅国家,话大唔大话细唔细——点解孔子唔讲“道百乘之国”或者係“道万乘之国”?咁就话佢不得己之下嘅聪明嘞:小国佢不屑,大国不屑佢,揾个“中”国啱啱好。治理噉嘅国家,孔子认为,首先对嗰啲国家大事,要有一种“敬畏”嘅态度,严肃认真噉去处理。仲有嘅,就係诚信——嗱,“我泱泱大国,以诚信为本”,话要派一个太子去,就派一个太子去,点可以学人哋咁混吉啊:)喺财政方面,要注意节约开支,唔可以徙晒啲钱去整乜“形象工程”。仲要“爱人”添——咪住,呢度嘅“人”同“民”係唔同嘅,喺古文入边,“人”係指嗰啲士大夫阶级以上嘅“人”,“民”即係平民百姓。“爱人”,即係要爱护嗰啲做官嘅——点解要爱护啊?扯,你要靠晒佢哋帮你治理国家吖嘛!唔爱护,佢哋同你唔夹点得啊?千祈唔可以喐下就发威,畀佢哋有“伴君如伴虎”嘅感觉。讲到啲老百姓,就要谂办法让佢哋“热爱劳动”,照啲时令去耕作,唔可以误咗农时——因为佢哋有田耕有米收,就唔会搞搞震,多交啲租,仲可以保证“千乘”嘅粮草添。嗱,孔子呢句话,完全係企埋统治者一边讲嘅,今时今日,咁样嘅态度梗係唔得喇。可惜,依家有啲统治者,就连咁样“落后”嘅治国方针都做唔到,孔子九天有知,实要呕晒血添。
(插图:老饼)