港人讲嘢
□Inzaggio
1.情窦未开
第一次恋爱之前,我认为自己就係杨过,而我同书里面个杨过唯一唔同嘅地方,就係佢有只大雕。而我嗰阵,就钟意谂呢个相思同画眉多啲。同杨过一样,我从来冇谂过要考第一。我只需要爱情,只要揾到我嘅小龙女,我就可以抛弃学业,退隐山林,搬入新界住。但係我一定要住西班牙别墅,我唔住得邨屋,我怕蛇虫鼠蚁。然后每个月至多出一次市区,不过我唔会逗留得耐,问阿妈攞完零用钱我就会入番入去。……而喺我第一次恋爱之前,我嘅小龙女只需要一个条件,就係靓,我知我咁样谂好肤浅,但係嗰阵时我仲细,唔知道原来身材都好重要噶!
(都仲係好肤浅,最好个女仔仲要有车有楼,老窦係特首,斯文贤惠,又品性兼优……谂坏个脑啊,畀心机做嘢啦。)
2.性
圣人话:“食色性也!”食同色,好唔同!一个人无论几钟意食,会唔会畀几十文入戏院睇套《蒸气腾腾小笼包》?一个人无论几钟意食,又会唔会为咗望一嚿冇包住嘅牛肉望到畀车撞?
(噉唔知啲食物改成呢啲名会唔会吸引人啲呢:雪白性感小馒头、修长撩人炸鸡肶、诱惑你越轨-两条交叠嘅油炸鬼?)
3.闹人
以前我哋笑人,会话:“你有得发达?太阳由西边出嚟啊!”依家我哋就会话:“你有得发达?建筑面积等于实用面积啊!”又或者话人丑,现在我哋都会技巧好多:“你唔丑,你点算丑啊,你係块面唔多实用噉解嘛。你嘅鼻台太大,啲眼耳口鼻咪唔见使啰。”
(其实建筑面积同实用面积边个大啲真係唔重要,最紧要係求下啲房地产开发商唔好咁“航空母舰——食水深”!楼价一日唔定,我哋啲星斗市民就一日都冇啖好食噶。)