粤讲粤明
□李永源
本人痴迷于山水。但係鉴于自身嘅财力,我出游选择嘅皆为实惠嘅两三日游嘅短线,奈何朋友圈中偏冇同道中人,一个人去又唔係几好,以致时常为此放弃出行。不过,在每
年嘅寒暑假期间则係例外,其时可以同放假嘅女儿、老婆一齐去,有时甚至仲能够邀请到平时唔肯去嘅朋友,前提係,佢嘅仔女想旅游——“一切为了孩子”吖嘛!
近日想去参加省内某山两日游,呢次又等咗差唔多一个月,依然揾唔到人同往。
嗰日,我同几个朋友喺某家常去嘅酒家饮茶,我正发牢骚话冇人陪我出行,突然旁边有人答讪,一睇,原来係隔离台一位三十几岁嘅女茶客。佢喺隔离服装城卖成衣,彼此都係熟客,属于点头之交。当即佢就加入咗话圈。佢仲话好中意旅游,只不过亦係无人陪啫!
闻言我顿生“同病相怜”之感:知音咪喺眼前咯!但我一谂:味住,佢有老公喔!佢同我一齐去孤男寡女,掂唔掂啊?谂到呢度我便兜个圈试探问:“你唔使看档、行得开咩?”“要个老公来做咩……”佢不屑咁话。临别时,佢仲强调“几时去记得出声”。
过后我谂,会唔会佢哋双方感情有变?我虽只在乎山水之间,但仍然有所顾忌,因此,几日后喺电话度告知佢出发时间嘅同时,冇忘记再次求证:“两个人去噃,怕唔怕吖?”佢话:“怕乜啫!”人哋女人之家都咁有胆,我死就死喇!
第二日早上佢忽然来电:“哎吔,得咗重感冒,发烧兼埋个喉咙痛,咳到阿妈都唔认得,唔好意思!下次再去过喇!”……当日下午,我又应朋友之约去嗰间酒家饮茶,啱一坐低,但见佢坐喺附近一张台,正喺度大啖大啖咁食紧炸春卷,哇!咁热气,重感冒仲敢食?
又打回原形,睇嚟,我唯有上网征集游伴,隔山买牛算喇!冇计,至多小心啲,先睇清楚对方个样再定夺咯!