粤韵飘香
□陈锦荣廖伟斌
“好佳果，品种各异。爽口桂味，肥浓糯米糍。荔枝早熟早上市，三月红有名气，増城挂绿美名驰。黑叶荔枝甜又脆……”呢段唔係商家卖荔枝嘅广告，而係名曲《荔枝颂》
里面嘅一段唱词。
呢支曲仲有一段威水史添。早喺1957年，著名嘅粤剧表演艺术家红线女，就将呢支曲唱到莫斯科，参加世界青年联欢节东方古典歌曲比赛，拎咗个金奖。红线女名扬四方，呢支曲自然係家喻户晓、红过荔枝咯。
女姐唱红咗《荔枝颂》，流传至今半个世纪，当然係靠佢嗰把世界级嘅靓声。行家赞佢音域宽广、音色完美、吐字清晰，绝对係实至名归。但係能够成为名曲，除咗声靓，仲要讲“腔口唱功”嘅。《荔枝颂》节奏明快，基本上係流水板旋律。女姐不但吐字清楚，唱得轻松活泼。而且将滑音、装饰音运用得惟妙惟肖，恰到好处，真係抑扬顿挫，节奏鲜明。好似“珠江两岸歌声起”一句，佢将“歌”字一气唱咗五拍，随之快速换气，又将“声”字唱成六拍，同前面“珠江两岸”嘅节奏形成鲜明对比，突出“歌声”两个字。表现一班后生仔女一面摘荔枝，一面唱歌嘅欢乐气氛，真係别出心裁——咪话一句曲咁简单，一经处理，真係点石成金。
支曲嘅作者亦非等闲之辈，佢係已故著名编剧家陈冠卿老先生。听讲当年係同女姐度身定做，难怪女姐唱得咁挥洒自如。卿叔呢支曲的确构思巧妙，佢用一支旋律极简单嘅小曲“四不正”开头，再以粤剧嘅“快板”做基本曲牌，加上新腔，噉就成为一支咁好听嘅粤曲，真係少几个音乐细胞都搞唔掂。
名家名曲，人人爱唱。一代又一代嘅粤剧花旦，个个薪火相传，如果唔识唱《荔枝颂》，真係“叻极都有限”。《荔枝颂》真係好似岭南佳果荔枝噉，年年鲜红亮丽，岁岁长开不谢。
