我嘅《帝女花》情结

　　粤韵飘香

　　□李池湘

　　“落花满天闭月光，借一杯附荐奉台上……”

　　呢首《帝女花香夭》嘅小曲，调寄广东音乐“妆台秋思”，亦係长剧《帝女花》入边嘅戏胆(主唱段)嚟。

　　《帝女花》呢个戏，讲嘅係明朝末期，李自成大军杀入京城，崇祯皇帝仓皇逃去景山，绝望之下吊死喺树上。崇祯嗰女长平公主喺兵荒马乱中，同驸马周世显走散咗。之后公主出家，历尽艰辛，卒之同驸马重逢。而《香夭》呢段小曲喺全剧嘅戏尾，讲嘅就係公主同驸马虽然破镜重圆，但係又觉得国亡家破，寄人篱下，万念俱灰双双饮毒自尽、以身殉国嘅情景。

　　呢段小曲，因为旋律哀怨，幽恨缠绵，曲词易记，琅琅上口而流行，可以讲係家喻户晓，耳熟能详。

　　人哋话，一首曲可以令一出戏成名，此言不假，呢首《香夭》就係《帝女花》全剧嘅灵魂，好多人都係冲住呢支曲去睇《帝女花》呢出戏。

　　《帝女花》嘅作者係香港名编剧唐涤生，佢好有才华，可惜英年早逝，留低咗《帝女花》、《再世红梅记》等传世佳作。

　　《帝女花》亦係香港嘅名伶任剑辉、白雪仙嘅戏宝，佢地传神嘅演绎令到曲中人物深入民心。我都係因为睇呢出戏先至将任剑辉引为偶像嘅。

　　记得1986年，我同广东粤剧院一团去澳门演出，任姐同仙姐嚟捧场。散场后，我哋一齐去葡京酒店消夜。嗰晚我好开心，我执住任姐只手话：“任姐，我睇过您好多戏，我最钟意就係你嘅《帝女花》！”任姐笑住话：“哈哈，我都好钟意噶！”她平易近人嘅笑容令我感到好温暖。

　　但係过咗冇几耐，就传嚟咗任姐去世嘅消息，令到我悲痛万分。嗰一段日子，我喺电视一睇见任姐嘅戏就伤心。我差唔多有一年嘅时间冇上台唱过《帝女花香夭》呢一首曲，因为我每一次唱都会谂起任姐嘅音容笑貌，跟住就眼泪直流。