动物王国嘅军事化管理

　　白话愚言

　　□Pippo阮

　　动物王国有一位新成员，佢复姓曹犬，名叫巴闭，係一只哈巴狗。曹犬巴闭同狐狸秘书好熟，见到个死党捞得咁掂，佢都想搵啲嘢搞下。于是，佢就叫狐狸秘书同狮子哥讲，有一种军队化嘅管理，可以通过操练，令到大家更有纪律，更加正规，噉样大人您咪可以更好噉管理动物王国咯。狮子哥觉得呢个办法唔错啊，就叫狐狸秘书去跟进。噉秘书就趁势推荐，话曹犬巴闭从人类社会留学返嚟，曾经做过军犬(其实佢畀人养喺后勤饭堂入边，赶过下老鼠噉啫)。佢识唔少训练嘅方法，可以胜任呢项工作。

　　狮子哥话好啊，噉就即刻成立咗一个类军队化管理办公室，畀曹犬巴闭一个衔头——类军队化总指挥，首先喺猫科类动物区开展类军队化训练嘅试点工作。曹犬巴闭重谂咗一个好大嘅名堂：学习借鉴人类有纪律、够先进嘅特点，全力打造一支高水平、高素质嘅动物队伍！

　　噉就惨咯，啲狮、虎、豹、猫等等都要捉晒过嚟，一日到黑，唔係立正、睇齐，就係左转、敬礼，真係苦过弟弟。曹犬巴闭又好醒目喔，成日邀请狮子哥过嚟参观指导，离远见到揸fit人就伸恒条脷冲埋去报告操练情况，又猛咁指挥啲狮、虎、豹、猫向住狮子哥嗰个方向练习敬礼，仲成日抹汗(虽然狗冇汗腺)，扮晒好落力辛苦添。见到成班人排晒队列噉行来行去，又成日向住自己敬礼，嗰种感觉梗係梳乎啦。狮子哥就赞咗总指挥两句，又肯定咗佢嘅付出。今次曹犬巴闭就变咗瓦檐狮子——叻到抿咯，佢打算将呢个类军队化操练变成一个考核制度，边个两次考核唔达标嘅就要将佢革职。跟住佢喺原来训练动作嘅基础上面又增加多一个动作——掤直只脚嚟操步，搞到班猫科动物练到歪下歪下噉。后嚟唔知点解啲人类觉得呢种动作行起嚟好摇曳生姿，就借鉴咗过嚟，用于展示时装，称之为“猫步”。

　　依家呢班可怜嘅猫科动物畀呢个操练搞到筋疲力尽，连追猎物都冇力，正常嘅工作生活都打到乱晒。个个喺度埋怨呢种唔切合自身实际嘅做法，话今次真係阿茂整饼——冇嗰样整嗰样啊！

　　(插图：骠戈)