Ralax之出国篇

　　港人讲嘢·许冠文鬼马Talkshow

　　□记录莫夕

　　有人话，个个香港人依家都有啲钱，放松自己梗係去外国玩下啦，搭飞机离开咗香港，我唔信你解压唔到。

　　去边度啊依家？去日本啊？惊地震；印尼？又惊海啸，泰国又惊海啸……去边度呢？搭飞机啦去远啲啦，去美国怕得嘞啩？

　　我最怕吖，尤其是911之后呢，我绝对唔肯去美国，因为我依家完全顶唔顺佢啲霸权主义啊。譬如你过佢海关呢，你就激死。首先要将你啲手提行李摆上去x光嗰条带上面，跟住除埋条皮带摆喺上面，因为惊住佢有刀；跟住要除埋两对鞋摆喺上面，惊住有炸弹。好嘞，过咗之后先发觉原来你嘅手提行李入面有只指甲钳噃，要你去隔离室检验。噉你跟住就行过去隔离室，好远个喔大佬，五十几尺个喔，一只手就抓住手提行李，一只手就抓住皮鞋，条皮带就用个口咬住，噉就变咗一路行条裤就一路甩，又无手去“优”喔！噉就裙拉裤甩噉行过隔离房。所以如果大家去美国嘅话，千其要记住着名牌底裤啊！如果唔係，畀人睇到你着咩“菊花牌”就修家啦！好嘞，到你过到去嗰边之后啦，佢就话你嘅手提行李入面，有一个指甲钳，係大杀伤力武器，要充公，因为惊住你劫机！

　　唔係啊嘛，大佬，点劫机啊？“你！坐低！边个喐亲，剪佢手指甲！”噉啊？噉劫啊？“呢个空姐，你再嗌啊，你嘅水仙甲都剪埋你嘅！三千蚊一次嘎！公仔都无埋！……阿婆！你再嗌我脚甲都剪埋！”係咪噉呢？佢唔理你咁多口架！霸道吖嘛依家，没收就没收口架嘞！