忘尽心中情

　　金曲寻味

　　□卢碧玲

　　忘尽心中情／遗下爱与痴／任笑声送走旧愁／让美酒洗清前事……昨天种种梦／难望再有诗／就与他永久别离……未去想那非和是／未记起从前名字……

　　呢首我好钟意嘅粤语经典金曲叫做《忘尽心中情》，係香港第一代粤语流行曲歌星叶振棠嘅“首本名曲”，亦係当年武侠剧《苏乞儿》嘅主题曲。

　　叶振棠嘅声线几独特，唱歌时带啲鼻音，好有沧桑感。所以，喺上世纪八十年代香港武打电视剧最辉煌时期，为咗更好噉衬托武侠剧入边曲折嘅情节、悲壮嘅场景，嗰啲音乐创作人如黎小田、黄霑等都偏爱噉将主题曲畀佢唱，如《万里长城永不倒》、《戏剧人生》、《天蚕变》等等。以至于武侠剧主题曲几乎畀佢“霸”咗成半，成咗佢嘅半个专利；电视剧主题曲亦因此成为佢嘅所有歌曲嘅主要组成部份，而最受好评嘅呢首《忘尽心中情》亦嚟自于此。

　　四海为家，将昨天嘅一切睇成“种种梦”，更要将得失、恩怨、情仇等一一割舍，但真正做到如此洒脱又谈何容易啊？除非灌醉自己，“难分醉醒”，又或者诈傻扮懵先得啫！

　　呢种矛盾交织、痛苦孤寂嘅心路历程，通过沉缓顿挫嘅曲调，经由叶振棠嗰把沧凉嘅声线演绎出嚟，实在係双剑合璧喇！难怪呢首歌当年一问世，其风头便一时无两咯！正如有评论话，叶振棠有咗呢首歌之后，“好歌一首就够啦！”

　　【未经许可，本版文字不得转载】