千秋岁

　　宋词粤读

　　□ 黄永健

　　原版

　　数声鶗鴂，又报芳菲歇。惜春更选残红折。雨轻风色暴，梅子青时节。永丰柳，无人尽日花飞雪。

　　莫把幺弦拨，怨极弦能说。天不老，情难绝。心似双丝网，中有千千结。夜过也，东窗未白孤灯灭。

　　粤语版

　　几声雀叫，话花又谢了。拗返几枝唔得掂。横风横雨嚟，杨梅青BB。嗰樖柳，冇人成日都飞絮。

　　咪郁嗰条线，郁亲有得怨。天唔老，情就有，心似鱼丝网，里边好多结。成晚夜，就嚟天光未瞓着。

　　“鶗鴂”，係话杜鹃。鸟语同花香，本来係好景嚟，但係佢噉写又点睇都有啲擸住擸住，因为佢话啲雀仔叫係提醒你又过咗一春嘞。人係噉口架，有花畀你都未够，仲想留住个春天。花开花落，月圆月缺，好自然嘅，该点样就点样。最怕係该嚟嘅唔嚟，唔该嚟嘅又嚟咗。雨都係噉，睇下咩时候落。好雨知时节，杨梅黄嘅时候落就冇相干，叫做黄梅雨。贺铸嘅《青玉案》有：“一川烟草，满城风絮，梅子黄时雨。”，但係青BB就横风横雨，未熟就畀“吹”残，真係唔掂。“永丰”，係一个牌坊，出处係白居易嘅《杨柳词》：“永丰东角荒园里，尽日无人属阿谁。”边个都唔属，即係冇人要。上片主要写景，引用咗三个典故。

　　“幺弦”，琵琶第四条线，声尖凄怨。天荒地老，此情不渝。“心似双丝网，中有千千结”，一语双关，“双丝”，直头就係“相思”。琼瑶阿姨嘅《心有千千结》喺上世纪七八十年代风摩万千少男少女，又顺便帮张先宣传呢首词。“孤灯灭”，有啲话係“凝残月”，各有好处，孤灯灭就好似生动啲，有动作。东窗未白，残月犹明，孤灯一盏，可有可无，虽然未瞓，吹熄无妨。一句到尾：成晚眼光光，冇瞓。