柯子岭遇仙记

　　羊城讲古台

　　□ 庞力行

　　喺好耐以前，广州白云山西南面山脚，有条叫做“三姓围”嘅小村，住咗陈、谢、刘三户客家人家同一个叫柯子嘅后生仔。柯子十四五岁，孤身一人，斩柴为生。

　　有一日，柯子好似平时噉样上白云山西南面嘅山岭斩柴，睇见一片以前冇见过嘅柯子树林，里面仲有潺潺流水声。柯子又饿又渴，就放低斩柴刀同木柴，入去树林揾水饮喇。山泉边有一个老人家正喺石台度同人捉棋。老人家见柯子话颈渴，就将石台上面嘅两个柯子树果送畀柯子食。柯子食咗柯子树果，即时饥渴全冇，成个人仲精神焕发添。柯子睇见两个老人家棋艺不凡，就企喺旁边睇佢啲捉棋。嗰个老人家捉完咗一盘棋，就对柯子讲：“你喺呢度好耐嘞，仲唔返屋企睇下！”

　　柯子行出树林，见到放喺柯子林外边啲木柴枯成咗木泥，斩柴刀变咗一渣铁锈？柯子觉得好奇怪，但睇见天就快黑咯，就冇谂咁多，急急脚就赶返去村嘞。

　　返到村里面，柯子傻咗眼：点解村里面多咗咁多屋？自己嘅泥砖屋成咗一堆泥，上面仲生满杂草？柯子揾咗全村嘅屋，啲人冇个识得，又冇人认得柯子係咩人！村里面嗰个最老嘅阿伯话：“听我阿爷讲过，以前呢度係有个叫柯子嘅后生仔住过，有一次去咗白云山斩柴就冇返来咯，算起来係一百年前嘅事喽！”

　　柯子无家可归，满肚猜疑，于是就返到白云山柯子林揾嗰个老人家问个究竟。老人家笑骑骑噉讲：“我係柯子仙翁，你已经入咗柯子林仙界，可知天上一日，世上千年啊？一盘棋嘅光阴，正好係人间一百年！你食咗我啲柯子仙果，已脱离凡身，仲係留喺我呢度嘞！喺柯子树下悟道，待我引你成仙啦！”

　　柯子成咗仙童，将喺白云山遇仙嘅经过报梦畀三姓围嘅村民知。村民先知道柯子原来就係三姓围嘅先人。于是全村嘅人都上山去揾，但係一直都揾唔度柯子树林同柯子嘅踪影。为咗纪念柯子，后人就将白云山西南面嘅山岭叫做柯子岭，三姓村就叫做柯子岭村嘞。