天狗跌咗个大金钟

　　羊城讲古台

　　□ 庞力行

　　话说喺天庭上边，王母娘娘开蟠桃大会，请咗天上各路神仙同西天众佛嚟赴会。二郎神嘅哮天犬由于只属天上不入流嘅小仙兽，所以冇资格到会。哮天犬一早就知道食蟠桃可以大增神力，就趁满天神佛混乱嗰阵，窜入蟠桃会偷咗两个蟠桃，谂唔到就畀值日星君当场捉住。

　　王母娘娘降下惩罚懿旨：将哮天犬打入太上老君嘅炼丹炉，煎熬七日。

　　七日期满，哮天犬畀煎熬到骨瘦嶙峋、掉毛甩皮，放咗出炼丹炉。佢习惯噉甩咗两下身上嘅灰尘，点知嗰条颈链已经断咗，连埋吊喺链上嘅金铃一齐甩咗出南天门，跌咗落凡间添！

　　哮天犬为咗执返颈链同金铃，一路追落嚟，追到咗广州嘅白云山摩星岭，睇见金铃将白云山西面山脚，砸咗一个好大嘅钟形深坑，金铃化作一潭清水，成咗大金钟水库啰；颈链跌咗喺白云山上，亦砸出一条好长嘅山沟，颈链变成一股泉水，成咗濂泉。哮天犬见两件宝物都已经冇办法收返，一下气急攻心，瘦弱嘅身躯再支撑唔住，就碌咗落白云山东面嘅山脚外面，再爬唔返起嚟嘞，变咗一堆山泥，就係依家嘅瘦狗岭喽！