台仙湖街嘅金花姑娘

　　羊城讲古

　　□ 陈明

　　旧历四月十七，係广州民间传说嘅“金花诞”。呢个传说，同一个细路女有关。

　　喺明朝嘅时候，有一日，广州一个巡按嘅夫人临盆难产，急得巡按成头大汗，四围求神拜佛都冇用。晚黑，大老爷发梦，梦见一个白发老人同佢讲：“要等你嘅夫人平安生仔，除非请金花女嚟。”讲完就唔见咗。大老爷梦醒后，即刻派出差人，四围揾金花。当时广州名叫金花嘅女子，冇一百都有几十。差人去咗冇几耐，就捉咗一个“金花”返嚟。呢个姑娘先係十三四岁，佢啱啱畀带入厅堂，就有人从房里报出：夫人已平安生落贵子。巡按大人开心到咩噉，连连向金花磕头，话佢真係天仙降世，解救咗佢夫人嘅大难，搞得金花惊魂唔定。于是，“金花姑娘係个神奇嘅催生婆”嘅消息一传十，十传百，越传越广，一下子就传遍咗十里羊城。

　　传嚟传去，金花姑娘又被讲成咗“金花娘娘”。以后凡有生仔嘅产妇，都要请佢去保佑。呢个十多岁嘅小姑娘，就噉样成咗“神仙”。既然成咗神仙，凡人就唔敢同佢结婚。金花到咗廿几岁，仲係一个孤独神仙，内心好苦恼，最后投湖自杀咗，嗰个湖，就因此得名为“仙湖”，就喺依家惠福东路一带。后来呢度畀填平，就叫做“仙湖街”。金花嘅尸体浮喺湖面上，大家将佢打捞起嚟，全身仲係暖嘅。街坊百姓帮佢换上新衫新鞋，准备揾地方安葬佢。点知第二日一早，金花嘅尸体竟然变成一具玉尸，通体透明，十足一具纯玉嘅塑像，而且散发出一阵芳香嘅气味。十里内外嘅街坊听讲都赶嚟睇呢个奇迹，大家即刻捐资喺仙湖边兴建一座祠庙供奉佢，仲为佢塑神像，叫佢为“金花夫人”。

　　以后成个羊城嘅人都来祭拜“金花夫人庙”，向金花夫人求福，听讲都几灵嘅。大家深受佢惠福，于是就叫呢条路做惠福路。但后来庙址亦几经变动，拆来拆去，最后移到河南，叫做“金花庙”。后来，广东城乡唔少地方都有金花庙，听讲就是从广州传去嘅。