嗰一年嘅儿童节

　　广州往事

　　□ 陈颖雅

　　儿童节又到嘞，我已经唔做儿童好多年嘞，不过当我谂返起旧时过儿童节嘅趣事，都会由个心度笑出嚟。

　　读小学三年级嗰年，学校同老师都好重视儿童节，提早一个星期同我哋讲儿童节当日嘅节目安排。嗰日唔单只唔使上课，全校开联欢会，玩游戏，玩完仲有礼物收添！我哋班哇鬼就梗係开心嘞，足足兴奋咗成个星期啊！到咗六一嗰日，学校批准我哋唔使着校服，我哋个个都着住自己最钟意嘅衫，女仔戴住自己做嘅大红花，个个都好似花仙子噉靓。我哋排排坐喺学校礼堂睇表演，有高年级嘅同学仔表演大合唱，又有少年宫嘅同学仔跳芭蕾舞，仲有学校啲老师跳折扇舞添。我记得，我嘅班主任係跳得最好嗰个。睇完表演有游戏玩，每个班派代表玩“争凳仔”，老师点咗我嘅隔篱位上去玩，佢好争气噉帮我哋班赢咗个年级第一返嚟，当时佢个得戚样，我依家都仲记得。不过，我都唔使羡慕佢，因为游戏之后搞抽奖，我居然中咗特别奖！当我喺校长手上面接过嗰套彩色画笔嗰阵，其他同学仔都好羡慕噉望住我，我觉得自己好幸福啊，仲威过拿奖学金！

　　联欢会结束之后，阿妈嚟学校接我，见到我咁叻，就应承星期日带我去人民路嘅儿童公园玩，仲可以吃薯条同雪糕添。嗰年嘅儿童节，係我过得最开心、“收获”最丰富嘅一次嘞。