游戏中长大

　　粤讲粤明

　　□ 樊泳欣

　　读小学嗰时，屋企嗰条街嘅细蚊仔差唔多都係我哋班嘅，一放学，大家跑返屋企掉低书包，就嗱嗱声喺条街度集中玩游戏啦。我哋玩乜？跳橡筋、跳大绳、跳飞机呢啲就肯定有嘞。上次去义教，仲见啲小学生玩，但係，果时我哋最钟意玩嘅“自由木”、“伏匿匿”、“红绿灯”等就好似失传咗啦。

　　仲记得玩“自由木”嗰阵，啲朋友仔鬼咁狡猾，我差唔多要捉到佢时就即刻话“木”，即係变成棵树嘞，噉我就冇佢符啦，唯有揾其他目标。佢哋钟意几时变树就变树，几时变正常就几时变，真係免死金牌啊！所以做捉嘅嗰个人就惨啲嘞。“伏匿匿”就更辛苦啦，“自由木”都有成堆人畀你捉，但係“伏匿匿”係啲人匿埋等你揾口架，成条街咁多地方，真係大海捞针口架。就係噉，我哋日日都好似只甩绳马骝咁跑通街，唔经唔觉，我哋就长大啦。

　　我都唔记得我哋係几时开始冇玩呢啲游戏口架，可能係小学毕业后，又可能再前啲，地铁拆迁，我哋各散东西嘅时候吧。依家谂返起都好怀念，好想再玩啊。不过呢啲都係得个谂啦，咁大个人玩嘅话会畀人话我哋弱智口架。人大个咗，就唔可以再做甩绳马骝嘞，所以大家聚埋一齐玩嘅游戏都要长大啦。上网打机、烧烤、唱K；好动嘅就打下篮球、羽毛球；好静嘅就三五知己揾个环境好嘅地方坐低，饮下嘢，倾下偈……虽然都好开心，但感觉就好唔同啦。