4·15　吾道一以贯之

　　栋笃论语·里仁第四

　　□ 子野专栏

　　【原文】子曰：“参乎！吾道一以贯之。”曾子曰：“唯。”子出。门人问曰：“何谓也？”曾子曰：“夫子之道，忠恕而已矣。”

　　【译文】孔子话：“阿参啊！我嘅思想体系，係有一个主体贯彻始终嘅。”曾参就话：“係。”孔子行咗出去，啲同学仔就问阿曾参话：“佢讲咩啊？”曾参话：“冇咩，老师嘅思想，不外乎忠、恕呢两样嘢啫。”

　　【栋笃】孔Sir同曾参师徒之间嘅对话，令人谂咗好出名嘅释迦同迦叶嘅“拈花微笑”。不过，曾参入孔门比第啲人迟咗少少，悟性亦就自然差啲。但係，当孔Sir同佢讲“吾道一以贯之”嘅时候，佢答：“係。”即係话，佢乜都明啵。当其他同学问佢嘅时候，佢就话：“老师嘅思想其实冇乜嘞，得忠恕两个字喷香。”

　　嗱，咩叫“识少少扮代表”，曾参就係嘞。究竟咩係“忠恕”？朱熹係噉讲嘅：“尽己之谓忠，推己之谓恕。”忠，即係尽忠职守，严以律己；恕，即係“己所不欲，勿施于人”，将心比心，宽以待人。我哋学习到依家，孔Sir嘅思想入边，咩係最重要嘅？梗係“仁”嘞，仲使讲咩？“仁”嘅后边，仲有义、礼、智、信等等，“忠恕”属于仁道嘅表现係冇错，但係，就仲要排喺“孝悌”之后——孝悌先至係“为仁之本”啊！

　　禅宗係“不立文字，教外别传”，即係唔讲得，讲究嘅係顿悟；老子话“道可道，非常道”，亦都係唔讲得。孔Sir嘅仁道，唔单止讲得，仲係要大讲特讲，令到天下人人都识添，噉先至可以达到天下归仁嘅目的。佢谂住同悟性唔高嘅曾参讲道，点知话一出口，曾参一个“唯”字，就激嬲咗佢老人家，拂袖而去，费事再讲。佢走咗之后，曾参唔知丑，仲喺度口多多讲咩“忠恕而已”，真係丢晒架啊！(插图：老饼)