5·7　道不行，乘桴浮于海

　　栋笃论语·公冶长第五

　　□ 子野专栏

　　【原文】子曰：“道不行，乘桴浮于海。从我者，其由与？”子路闻之喜。子曰：“由也好勇过我，无所取材。”

　　【译文】孔子话：“如果我嘅仁义之道得唔到推行，我就撑只木艇仔去海上面漂流。嗰个时候，能够同我一齐去嘅，可能剩番仲由一个人嘞。”子路(仲由)听到呢句话，开心到咩噉。孔子又话：“由仔啊，好勇斗狠，你就胜过我；讲到综合素质，你就唔掂嘞。”

　　【栋笃】嗱，上次我哋讲过，孔Sir赞佢嘅学生子贱係君子嘅时候，本来谂住啲弟子会顺口赞佢教导有方，圣人门下出君子啊嘛。点知阿子贡唔醒目，仲要孔Sir赞下佢添，搞到孔Sir单打佢係一嚿嘢(瑚琏)，梗未够秤做君子嘞。

　　呢次，唔醒目嘅人，轮到阿子路嘞。子路比阿孔Sir先至后生几岁，佢入孔门之前，係一个好勇斗狠嘅古惑仔，孔Sir上课嘅时候，佢几次去骚扰，淋红油，收陀地。后尾，佢就畀孔Sir嘅君子之风感染咗，投入咗孔Sir门下，希望修成正果，亦都得到一个“君子”嘅名号。呢段古仔，直情就係唐僧同孙悟空师徒嘅儒家版嘞。佢入咗孔门之后，亦都好似孙悟空噉，野性难驯，孔Sir几次遇险，佢都係喐下就喊打喊杀，冲喺最前面谂住要劈友添。

　　讲返呢句说话。孔Sir点解要讲“道不行，乘桴浮于海”呢？真定假啊？梗係假嘞。呢一句，肯定係孔Sir一时激气嘅话嚟口架。佢一生行咗十几个国家，到处推销佢嘅仁义之道，几次九死一生，都从未放弃过。梗係嘞，点样壮志豪情嘅人，都会有一时嘅心灰意懒。呢个时候，做人弟子嘅，最应该讲嘅係咩啊？梗係安慰老师嘅说话嘞。子路如果醒目啲，就唔应该“喜”，应该噉讲：“子毋忧。子之道，定大行天下矣！”畀老师一啲心理安慰，噉先至係做弟子嘅本分啊嘛。你唔单止唔识得噉讲，仲要开心到咩噉，你估阿孔Sir会点谂？噉就好似一个皇帝病咗，佢好惊死口架，佢就噉话：“弊嘞，我就要死嘞，我死梗嘞！”呢个时候，佢身边嘅太监或宫女，就应该跪低噉讲：“伟大领袖万寿无疆！高皇帝万岁万岁万万岁！”如果你懵剩剩噉，表忠心话：“陛下放心，陛下瓜咗之后，我实会为陛下殉葬口架！”噉你就死梗嘞，佢未死，你实死先！

　　不过孔Sir唔係皇帝，佢唔会咁残暴嘅。佢至多就用语言杀人，闹你一句“无所取材”，益咗你嘞，下次醒目啲啊。(插图：老饼)

　　图：

　　如果我嘅仁义之道得唔到推行，我就到天涯海角随处漂流！

　　师父要去海南岛旅游？

　　我又去！我又去！