恩宁路上嘅青葱岁月

　　广州往事

　　□ 陈颖雅

　　初中时候我读旧时嘅广州市第五十中学，虽然依家五十中同一中合并咗，改咗名叫“一中实验学校”，但係每次路过学校门口嗰阵，我都会忍唔住停低脚步望望，怀念下初中时候懵懂又快活嘅岁月。

　　记得初中嗰阵，学生哥都唔中意喺学校饭堂食午饭，我哋成班同学仔都中意出去外面食下快餐同小食。虽然阿妈成日话出面啲嘢唔卫生，但係细路哥边会听口架，贪新鲜吖嘛！五十中喺蓬莱路，嗰度冇咩快餐店，所以我哋成日行去隔篱嘅恩宁路。嗰度好多食肆，粥粉面饭样样都有，仲有蛋糕店、零食店，轮近啲中小学生都中意嚟呢条街食嘢。恩宁路嘅粉面档都係家庭作坊式经营，西关老屋阴凉嘅大厅被改装成铺面，老板一家就住喺内屋或者楼上。每日一到中午时分，面铺就会塞满嚟食中午饭嘅学生哥，迟嚟嘅人就要喺路边加位嘞。我同我几个老友中意去一间喺内街嘅面店，嗰度人少啲，冇咁嘈，我哋可以边食边倾下偈。

　　印象最深嘅就係恩宁路嘅钵仔糕嘞，放学嘅时候经常有个老伯喺路口卖钵仔糕，一蚊四个，而且有好多只味道，我就最中意食牛奶味，仲有红豆馅。我哋中意叫嗰个老伯做“钵仔糕阿伯”，我哋同佢熟络咗，佢经常请我哋食钵仔糕。嗰时我哋就觉得，佢卖钵仔糕唔係为咗钱，而係唔想日子过得太清闲，又或者想见到学生哥爽朗嘅笑容。

　　读咗高中之后，我就好少再见到“钵仔糕阿伯”嘞。听街坊讲，佢病咗一场，身体差咗就冇再整糕了。五十中已经成为历史，可能以后会冇人知道广州曾经存在一间噉样口架中学。依家，恩宁路要拆嘞，唔知第日会唔会有人记得恩宁路上老西关嘅故事呢？