就这样被牛杂征服

　　粤讲粤明

　　□ 雯卿

　　死党从北方来咗广州先唔够两年，对广州嘅熟悉程度居然大大超过我呢个喺度住咗四年嘅广东人。前几日同佢一齐去行街，行到北京路嗰阵，佢突然间停咗落嚟，话：“你有无闻到好香嘅牛杂味？”“梗係有嘞，嗰边咪就一间牛杂小铺啰！要唔要去吖？”佢眼睛眨眨下，做啲非常古怪嘅表情，好似想去食但係又非常之犹豫不决。“原来你钟意啲牛杂味嘅？不过点解之前都冇点样睇到你食嘅？”佢非常之郁闷噉同我讲，佢男朋友觉得喺街边攞住啲竹签食嘢实在一啲品位都冇，所以次次睇到都唔畀佢食喔。每一次出来食牛杂都係趁佢男朋友唔係一起嘅时候。我听到笑到唔得，话：“你男朋友要求真係高噃，食牛杂仲谂咁多品位唔品位嘅嘢，真係辛苦。”点知佢即刻换咗一个表情，非常之神秘噉同我讲：“其实我自己经常出来食嘅，仲知道边度嘅萝卜牛腩味最正吖！虽然都係站係街边食，不过真係好爽吖。”真係睇唔出佢古灵精怪居然一个人食咗好多间牛杂铺，重要好有经验咁同我讲，比如，蜂窝肚最好味嘞，仲有就係金钱肚、草肚、百叶都唔错嘅……原来哩个地地道道嘅北方人，已经畀牛杂完完全全征服咗嘞。

　　不过我自己谂下，牛杂嘅香味真係好难抵挡嘎，特别係广州嘅牛杂，唔单只用啲羊杂碎、茴香豆作香料，仲要用好多茴香、花椒、八角、桂皮等好多嘅调味品，嗰阵味真係隔住几条街都可以闻到。唔怪得好友完全唔顾虑自己嘅淑女形象，攞住竹签就係街边大食特食嘞。