荔枝情结

　　广州随笔

　　□曾丽玉

　　虽然依家搬咗去住高楼大厦，但旧址嗰个荔枝园仲深深噉留喺我心入面。

　　记得旧阵时，一到咗水果季节，果园度嘅荔枝就开始红红绿绿噉熟紧，屋企门口就会水蛇春噉长嘅车队，佢哋都係专门嚟食我哋果园入面新鲜摘落嚟嘅荔枝。有啲食客仲特登吩咐要包装得好好睇睇嚟送礼；仲有啲更夸张嘅，买十斤八斤返去坐喺屋企慢慢叹。

　　食客经常都会攞荔枝嚟考我话：“嗱，妹钉，有刺嗰种荔枝嗌咩啊？边种荔枝叫做糯米糍啊？”次次问亲我呢啲问题，我都会好认真噉答番佢哋：“有刺嘅一种叫桂味，仲有一种就係妃子笑喇，但价钱同味道上桂味比较好食兼贵少少。桂味食落清甜又爽口，唔会似妃子笑噉食落条脷有少少粗嘅口感；而糯米糍呢，入口够甜，味道够鲜，佢嘅外表平滑，冇桂味或者妃子笑咁刺手，相比之下，价钱亦都几贵吓。仲有个谜语係讲荔枝嘅：脱了红袍子，是个白胖子。去了白胖子，是个黑圆子。”

　　啲食客听完我噉讲之后就笑笑口话：“细路女，都知唔少喔！”呢个当然喇，点讲本人都喺果园生活咗十几年喔。睇住每年爸爸都会好落力咁喺日头下同啲果树施肥、淋水、打药捉虫，我个心都会好期待年年荔枝熟咗嘅季节，噉就会见到成班人开心又热闹噉倾偈、食荔枝。

　　其实我觉得最重要嘅唔係荔枝卖得好唔好，而係啲人食得开心、称心同放心。见到佢哋食得眉开眼笑个样，自己都好满足喇。