每当变幻时

　　金曲寻味

　　□曾锦燊

　　怀缅过去常陶醉／一半乐事／一半令人流泪／梦如人生 快乐永记取／悲苦深刻藏骨髓／韶华去／四季暗中追随／逝去了的都已逝去／啊，常见明月挂天边／每当变幻时／便知时光去……

　　《每当变幻时》，係1978年嘅“香港十大金曲”。原唱者係香港流行乐坛第一代粤语红歌星薰妮(唔係甄妮)。佢正係凭住呢首歌而一鸣惊人嘅。佢把声好靓，又清脆又字正腔圆。后尾佢较早就离开乐坛，但呢首歌亦早已深入人心嘞。可以噉讲，呢首歌仲出名过唱佢嘅人。

　　呢首歌讲嘅係，人生不如意事常八九，回想过往嘅一切就好似发梦噉。美好嘅体验固然值得怀念，但悲苦嘅经历亦总係挥之不去嘎。人生好无常啊，就算一块石头亦有可能变成翡翠口架。时间流逝得好快啊，就好似啱啱先见到太阳从东方升起，转眼间就话日薄西山啰！……逝者如斯，算罢嘞。

　　呢首歌题中之义其实并冇几多新意，但却胜在情深意远，言辞真切，形象噉反映咗普通人嘅心态，好容易就引人联想同思忆；兼且佢描写具象，用我哋熟知嘅景物作喻，悲情噉慨叹人生嘅无奈同埋短暂呢一“宿命”，就好似喺度暗示：做人无谓太过执着嘞。此外呢首歌结构严整，曲调自然流畅，娓娓道来，畀人一咏三叹嘅强烈感受；又易学易唱，因此就咁受欢迎、历久不衰嘞。