栋笃论语·学而第一
□子野专栏
【原文】子曰：巧言令色，鲜矣仁！
【翻译】孔子话：嗰啲成日卖口乖、整色整水嘅人，係好少有仁爱噶。
【栋笃】既然“仁”係儒家理论嘅基础嚟嘅，咁上一part有子从正面讲咗，孝悌係为仁之本。呢一part，孔老师自己郁口，从反面嚟讲，点样嘅人，就係少仁寡义嘅人。咁点解话，“巧言令色”嘅人，就好少有仁爱呢？大家要知，儒家係直头讲“性本善”嘅，“仁”，係发自内心嘅。心怀仁爱，行动起嚟，自然就会施仁执义，唔使口花花讲啲好听话、整色整水噉标榜自己。喺以后我哋要讲嘅“里仁”篇入边，孔子仲讲，“君子欲讷于言而敏于行”，就係君子要多做实事，少讲大话。返转头嚟讲，如果你喺社会活动中撞到一个人，成日卖口乖，讲好听话，假颜假色噉想得人中意，咁你就要小心嘞——有一个成语，叫做“口蜜腹剑”，讲嘅就係咁样嘅人，咀上开朵花，心内算死草——得个“奸”字。我哋睇《红楼梦》，大观园入边边个最巧言令色？唔使讲，肯定係王熙凤阿凤姐嘞。你睇佢喺贾母面前，每一句话都係令人每一个毛孔都舒服晒。但係你再睇下佢点样“毒设相思局”，整死贾瑞；又点样“弄权铁槛寺”，借着贾府嘅威势，进行权力寻租，不费吹灰之力就袋咗三千两银——正一个“巧言令色，鲜矣仁”嘅形象代言人来噶。喺现代社会，人心不古，边啲人最会“巧言令色”呢？睇睇当今嘅政坛、同埋演艺界嗰啲乌糟邋遢嘅嘢，仲使讲咩？咔咔。
(插图：老饼)
