广州笔记

　　□ 王婉芳

　　近年嚟，娱乐圈一直流传着雨神嘅神话，据闻萧敬腾[微博]无论去亲边度开演唱会，边度就雷雨大作口架。唔知系“好嘅唔灵丑嘅灵”定“有咁啱得咁桥”，反正镬镬系噉，神乎其神，重准过天气预报，难怪啲网友攞佢嚟讲笑话：“你不开唱，便是晴天。”

　　好似噉样嘅神人，我哋街坊当中就有一个。如果住喺小区里面话连阿勇都唔识喔，真系好打埋都有限啰。呢位仁兄有咩过人之处呢？佢唔似得萧少噉呼风唤雨，之前去亲边间公司打工，边间公司就执笠，常日打烂饭碗冇工开。而家就演变成一条———停电！去边度，边度就黑晒，唔系烧保险丝就系跳闸，认真超级无敌鬼见愁，神过雨神啊。“唔想见到你啊！”呢句阿勇已经听惯听熟咯，冇办法，自己都服得自己好紧要，次次系噉，人哋想唔当佢系衰神或者瘟神都唔得嘞。

　　好彩天有眼，上个月自认黑过墨斗嘅阿勇终于有咗用武之地。嗰日有个女仔为情所困，一时谂唔开，爬上高压线塔30米高处企图寻短见。吓到围观啲人气都唔敢唞。千钧一发嗰阵，有人大声嗌：“死唔去嘅，冇有使惊！阿勇喺度！”阿勇自言自语话：“人命关天，唔知得唔得口架。”说时迟那时快，话口未完啫，现场跳闸停电即刻应验！个女仔畀阿勇劝返落嚟。个个揞住肚皮笑餐懵，话阿勇简直就系奇人，关键时刻大发神威，应该奉为“电神”噉话。

　　就系噉，阿勇一夜成名，直情系威名远播添。而且意外事故变爱情故事，听讲阿勇“英雄救美”之后，同个女仔合晒眼缘，跟住重拍拖准备谈婚论嫁添啵，皆大欢喜啦。